Upplýsingar eru teknar af vef Orkuseturs, en þar er að finna mikinn fróðleik um orkunotkun og bætta orkunýtingu svo eitthvað sé nefnt.
Húshitun
Orkunotkun til húshitunar er háð stærð, gerð, staðsetningu og aldri húsnæðis. Forsendur Orkuspárnefndar gera ráð fyrir að meðalorkuþörf til húshitunar á íbúðarhúsnæði sé í kringum 60 kWh/m3.
Orkuveita Reykjavíkur hefur notað ákveðna stuðla til að meta eðlilega heitavatnsnotkun. Þar er vatnsnotkun á ári deilt með rúmmáli húsnæðis.
Orkuveitan gefur upp eftirfarandi viðmiðunargildi fyrir notkun hitaveituvatns á rúmmál húsnæðis. Lægra gildið er viðmið í vel einangruðu húsi með vel stilltu hitakerfi. Hærra gildið samsvarar eðlilegri eyðslu í húsi í þokkalegu ástandi.
Rúmmetri vatns á hvern rúmmetra húsnæðis á ári:
Stór fjölbýlishús 1,0 - 1,4
Minni fjölbýlishús 1,1 - 1,5
Einbýlishús 1,2 - 1,8
Heitavatnsnotkun
Með því að velja sturtu frekar en bað er hægt að nota helmingi minna af vatni. Betri orkunýtni fæst með krönum með einu handfangi sem auðvelda blöndun vatns og tryggja þannig að minna vatn fer til spillis. Þessir kranar eru einnig betri hvað varðar öryggi því að þá er minni brunahætta vegna hitaveituvatnsins. Í sumum verslunum er hægt að fá vatnssparandi sturtuhausa sem sprauta um 6 lítrum á mínútu. Margar gerðir sturtuhausa fara upp í 12 lítra eða meira.
